MASVONDO apfuura ndanga ndichinyora mugwaronhau rino reMadenyika/Matandilizwe (The Patriot) nezvechirongwa chesainzi iyo irikukurudzirwa nehurumende kuti vana vaidzidze muzvikoro zvose.
Chinangwa changu ndechokuti tibvise kutya kwakazara muvanhu vazhinj maringe nezvidzidzo zvesainzi.
Muzvikoro, sainzi inodzidziswa nemutauro weChirungu (English).
Vazhinji vane pfungwa dzokuti sainzi chidzidzo chinogona kudzidzisiwa neChirungu chete.
Zvakare sainzi yafamba mbiri yokunzi inorema kuidzidza.
Kazhinji vana vanoremerwa nomutauro weChirungu.
Saka mutauro unovharira vana kuti vasanzwisisa sainzi.
Iyi nhaurwa ndanyora nerurimi rwamai nokuti sainzi harusi rurimi, ruzivo rwezvakatikomberedza nezviri munyama dzedu.
Umwe murume wokuPoland akandionesa kuti vanhu vatema vomuAfrica kazhinji hatidzidzi sainzi asi tinopedza nguva tichitambura nemavara (vocabulary) erurimi rwamambokadzi wekuHingirandi.
Somucherechedzo, musainzi vana vanodzidza nezvemaruva.
Mudzidzisi anopa vana basa rokudoma mazita enhengo dzeruva.
Nhengo dzeruva dzinosanganisira katanda kakabata ruva (flower stalk), zvimashizha zvepasipasi zvine ruvara rwegirinhi (sepals), zvishizha zvine ruvara (petals), tumvere twakatakura mukume (anthers with pollen), katanda kepakati (pistil) kanonamira mukume (pollen) nekanhanga munoumbiwa tsanga (ovary).
Mudzidzi anonzi anyore mufananidzo weruva achizodoma mazita enhengo dzaro.
Akakwanisa kudoma nhengo dzose dzeruva anonzi agona sainzi.
Asi apa panenge pasina sainzi; kudoma mazita enhengo dzeruva chete.
Sainzi ndeyokuziva basa renhengo imwe-neimwe yeruva kusvika richizotipa mhodzi.
Pasainzi yeruva, chikuru kuziva kuti mukume ndiyo mbeu yeurume, uto tutsanga tudikidiki turi mukati mekanhanga kepakati ndiwo mazai.
Zvikasangana panobuda mbeu inorarama ikamera.
Isainzi yakakosha kuziva nzira idzo mukume ungasvika pamusoro wekatanda kepakati.
Zvino gurukota redzidzo yepamusoro neruzivo rwesainzi nezvemichina yemazuva ano Muzvinadzidzo Jonathan Moyo vatumwa neHurumende kuti vakurudzire kudzidziswa kwesainzi kubva Grade 0 kusvika kuYunivhesiti.
Hanzi sainzi ngaidzidziswe kuvana vose.
Ko vadzidzisi, nemi vabereki, muchaita sei?
Ko chakaipa chii kuti tingoita zvamazuva ose apo vana vazhinji vachinyanya kuita zvidzidzo nemadhigirii enhoroondo, mutauro wechirungu (English language), shoko (divinity), tsika namagariro (humanities and social sciences) uye kuchengetedza upfumi nemari (commerce and accountancy)?
Vashoma ndivo vanofunda sainzi.
Nhasi regai tionesane chikonzero chaita kuti hurumende ipindwe nepfungwa yokuti dzidzo muzvikoro ngaikoshese sainzi nekushandiswa kwemichina yemazuva ano.
Mukurarama tinoshandisa zvinhu zvakasiyana, zvizhinji zvinogadzirwa mumafekitari.
Iwo mafekitari anodawo zvokushandisa zvakawanda zvinobva mukurima.
Muenzaniso tingapa donje, chibage kana soya bhinzi, izvo zvinorimwa munzvimbo dzakasiyana muno muZimbabwe.
Ruzivo rwesainzi runodiwa kuti tirime mbesa dzakawanda dzichitipa mukoho mukuru.
Sainzi inotiudza kuti mhando yembeu inokura zvakanaka munzvimbo nenzvimbo ndeipi uye kuti mbeu inoda mvura, fetireza nomushonga upi uye wakawanda sei.
Michini inoshanda kufekitari inogadzirwa noruzivo rwesainzi.
Motokari dzinotakura zvirimwa nezvigadzirwa dzinoda magodobori esainzi kuti dzinyatsoshanda zvakanaka.
Tikaenda kudivi reutano, tinoonazve kuti ruzivo rwesainzi rwakakosha.
Mashandiro emuviri wemunhu anoda kunyatsoongororwa, idzo nyama dzomuviri dzichinyatsososonorwa mamiriro adzo.
Ko chiremba angazorapa sei kana kuvhiya munhu asina ruzivo rwakakwana?
Angatotiurayira varwere.
Saka mienzaniso miviri iyi inoratidza pachena kukosha kwesainzi mukuvaka upfumi neutano hwedu.
Nerimwe divi, tinoona kuti kana ruzhinji rukadzidza sainzi dzezvinhu zvakavakomberedza, vakazvishandisa nounyanzvi zvichaita kuti nharaunda dzichengeteke kuti vana vedu remangwana ravo rijeke.
Tikatarisa paupfumi hwenyika, tinoona kuti nyika isina ruzivo rwesainzi ichararama nokupemha ichitenga zvigadzirwa kune dzimwe nyika.
Izvi zvinoreva kuti nyika isina sainzi nemichina yayo inogara yakabudisa mari kutenga zvinhu kunze.
Zvakaita seZimbabwe, kuti tiwane mari yekunze, tinofanira kutengesera dzimwe nyika zvigadzirwa zvemuno munyika.
Tikatora zvicherwa tikatengesa ari matombo anotiwanisa mari shoma.
Tikabika matombo aya kuburitsa simbi chaiyo tikazogadzira midziyo yakanaka, tinoitengesa nemari yepamusoro, nyika younganidza upfumi, upenyu hwevagari vemuno hwovandudzwa.
Kubva pakuchera, kubika simbi nokudzigadzirisa midziyo zvinoda ruzivo rwesainzi nokushandisa michini yemhando yepamusoro.
Sainzi ndiro suo rokupinda munezvakawanda zvinopa mabasa nemari dzepamusoro.
Saka hurumende yeZimbabwe yatora danho rokukurudzira kudzidziswa kwesainzi neruzivo rwemichina yamazuva ano senzira yokupa vanhu vemuno masimba ekevandudza upfumi nemagariro kuburikidza nokuzvigadzirira mbatya nemidziyo yokutengesa kunze tichipinza mari.
Ndiyo nzira imweyo yakaburitsa nyika dzose dzatava kuti dzakapfuma.
Chinyorwa chinotevera chichatarisa mhando dzesainzi nenyaya yorurimi runoshandiswa kudzidzisa sainzi muzvikoro.
Dai tabvuma kuzvisunungura.
Sainzi ndizvo.
I have shown you that ‘science’ is at the heart of our agricultural activity to produce food crops.
If our science is poor and we have little understanding of how our crops grow and how the soil supports this growth, we may produce low yields and worsen hunger and malnutrition among the people.
We all know that those who attempt to grow a crop without applying the correct ‘science’ experience poor harvests or total crop failure.
This principle applies to areas other than agriculture too!
We are saying therefore that there is no substitute for ‘sciences’ in any other field of human endeavour.
Sciences such as biology, chemistry, physics and mathematics are essential for our industrial productivity to improve.
We ignore them at our own peril.
We shall explore other examples in the next episode as we continue to demystify science, technology, engineering and mathematics (STEM).
The feared ghost of STEM must be exorcised in the schools and colleges.
Our teachers need to lose their fear of STEM so they embrace it as everyday phenomena surrounding us.
The curiosity of children must be whetted to promote the learning of science. Only then can we unleash the creative genius of the African child and take Africa to great technological heights!