Ilotshwe nguGenevieve Nkiwane yatolikelwa nguPatience Rusare
Kungenani lenkinga esihlangano lazo ngitshayela ihlombe amaZimbabwe ngokukhalipha langokuzimisela kwabo.
Ilizwe leZimbabwe ligcwele abantu abasebenza gadalala njalo abafundileyo.
Ngizathanda ukukhangela ingxoxo ezibhodha bhodayo ku internet ikakhulu.
Engihugileyo yileyo esola uMongameli welizwe kunkinga zonke ezihlangana lelizwe.
Lokhu sokwejwayelekile kakhulu ukuthi ngesikhathi izinto zingahambi kuhle abantu bakhomba umongameli welizwe, okwenza uzibuze ukuthi sokutheni ngabantu bakuleli esithi bakhaliphile?
Ngivumeleni ngitsho lokhu.
Kuleqembu elithiwa omathandilizwe beZimbabwe (Zimbabwean Patriot), engikholwa ukuthi laqalwa ngo mnyaka ka2013.
Ngaba yingxenye yaliqembu ngoba ngifuna ukukhulumisana lokuxoxa labodadewethu labomnewethu abaphetsheya.
Ubuso baleliqembu buthi:
Imbono lezimiso zabomathandilizwe
Njengabo mathandilizwe beZimbabwe sifuqwa luthando lwelizwe lethu.
Umathandilizwe wonke uzimisele ukuthuthukisa inotho yeZimbabwe ukuze abantu babelempilo egcono.
Omathandilizwe kumele babe lenhloniphe lesineke.
Masingabandlululi ngombala, ngolimi njalo singabi lenhliziyo ezibuthakathaka.
Siyahlonipha bonke ubukhokheli obuvela kumabandla atshiyeneyo.
Simele silethe ukuthula elizweni, ngokujabula okukhulu sibonisane.
Sithinta indaba zonke ezinakane lamaZimbabwe asabalele umhlaba wonke.
Indaba lezi zibalisa indaba zansuku zonke esihlangana lazo empilweni, ezenkolo lezamasiko.
Sikhuthaza abatsha ukuthi bafunde njalo bafundele imisebenzi yezandla ukuze babeyibukhokheli bakusasa obuzathuthukisa inotho yakuleli.
Siyalamukela lonke maZimbabwe njalo khokhani abangane benyu ukuze babeyingxenye yaleliqembu.
Ukuthula lenjabulo kuletha ilizwe elilokuthula lapho umuntu wonke aphila impilo elesisindo njalo eqoqekileyo.
Ngithi kini lonke:
UKUTHULA, UKUTHUTHUKU LENJABULO.
Amazwi alesisindo ngempela.
Kodwa kuliviki ngitshayisane lenye ingxoxo ebikhangelane lomongameli wakuleli, ukuthi nguye yedwa umongameli owayeseMalawi lapho ilizwe lelo lithakazela iminyaka engamatshumi amahlanu lizibusa.
Angisoze ngikhulume okunengi okwakulunywa ngomathandilizwe bechothoza umongameli wakuleli.
Ngayangeka kakhulu njalo kwanginenga ukuthi eyinye inkulumo esiyikhuphayo itshengisa ubuphukuphuku bethu.
Kungani sinxamele ekuthukeni umongameli welizwe nxa izinto singahambi kuhle elizweni?
Okudanisayo yikuthi kungxoxo le kwasweleka loyedwa owakhipha umcijo wokuthi njengoba umongameli welizwe ezakuba ngumkhokheli weSADC ngenyanga kaNcwabakazi ngakho ke sifuna singafuni kwakulendingeko yokuthi umongameli abeselizweni leMalawi.
Ngabe kahambanga ngesikhathi lesi kwakuzadingakala ukuthi ahambe uNcwabakazi engakafiki ukuze ayothatha ubukhokheli lobu.
Ngithanda ukukhumbuza odadewethu labomnewethu ukuthi ngomnyaka ozayo ka2015 umongameli nguye njalo ozabe esebokhosini bokukhokhela iAfrica.
Kuzadingeka njalo ukuthi ahambe eAddis Ababa.
Lizomhlasela njalo?
Njengenjayelo, amanye amazwe yiwo abona ukukhalipha lokuzimisela kukamongameli wethungesikhathi thina simchothoza ngomona.
Iqembu elifanayo elamaZimbabwe abaphila nzima njalo bedanile bephetsheya, ligcwele iziwula leziqholo.
Azifuni kuphindela ekhaya ukuze zizolungisa laphoezibona kulomonakalo.
Kuyadanisa lokhu.
Silungiselela abatsha ukuthi babeyibukhokheli bakusasa, ngithanda ukukhuthaza indodana lendodakazi eziphetsheya ukuthi zithathe imizuzwana, zizihlole ukuthi zingaphi njalo zafika njani?
Ungabe usebenza njalo uhleli uthuthukisa inotho yelinye ilizwe, kungabe kusemthethweni kumbe kungaphandle komthetho, akukutshintshi ukuba ngumuZimbabwe, kumele uziqhenye ngelizwe lakho.
Ngiphetha ngivumeleni ukuthi ngitsho ukuthi, ilizwe leZimbabwe livuseleka, yiloba amanye amazwe alichothoza ngemva kokuthatha umhlabathi, lamhlanje silakho ukuziqhenya ngokuphumelela kwezokwelapha.
UKupakwashe loTapiwanashe ngamaphahla ayebambene umzimba, azalwa ngoMabasa mhlaka 22 eHarare.
Abazali badabuka eMurehwa.
Amaphahla la behlukaniswa liqembu elilabodokotela labomongikazi abangamatshumi amahlanu.
Okwenza lesi senzo siqakatheke yikuthi umsebenzi wonke wenziwa liqembu lamadokotela labomongikazi bakuleli.
Ubaba walamaphahla uMoses Chitigo uthengisa izithelo lemibhida eMurehwa.
Abafana laba babelenhliziyo ezitshiyeneyo kodwa kungela mungcele.
Udokotela owayengomunye weqembu uBothwell Mbuvayesango wathi umsebenzi wokwehlukanisa amaphahla waphumelela ngoba basebenza njengeqembu bebambene.
Amaphahla okwamanje lokhe esesibhedlela eHarare Hospital, besila ngemva kokuhlinzwa ngesikhathi beselatshwa kuviki edluleyo.
Umsekeli womphathintambo wezempilakahle lokugcinwa kwabantwana uDr Paul Chimedza uthi lesi senzo saveza sobala ukuthi odokotela bakuleli balolwaza olujulileyo.
Siyathaba ngokuphumelela kweqembu leli.
Kuhle ukuthi sibale indaba eziphathelene labantu kanje.
Kusinika ithemba ukuthi singathola imali kunengi okumangalisayo esingenelisa ukukwenza.
Lokhu kuliqiniso ngoba sikhangele ukuthi ukwehlukaniswa kwamaphahla la kwenzeka ngesikhathi isibhedlela seHarare singela mali kodwa silabantu abakhaliphileyo kakhulu.
Amandla omuntu makhulu kakhulu.
Siyakujabulela lokhu.
Indaba le ithethwe kuThe Patriot yamhlaka Ntulikazi 25-31 2014.