Ilotshwe ngu Cde Bernadino Muvadi yatolikelwa nguPatience Rusare

NGANGILEMINYAKA elitshumi lantathu ngiqala ukuncedisa ibutho le ZANLA ko Zimuto eMasvingo.
Ngoba ngangisemncane ukuthi ngiyekulwa labanye, omunye u detachment commander uCde Tawanda wangicebisa ukuthi ngibe ngumujibha.
Umsebenzi wabomujibha wawungowokuba lilihlo kanye lonyawo lwabalwi bempi yenkululeko.
Abalwi bempi yenkululeko babeyandise ukusithuma kweminye imisebenzi njalo sasisenza njengokutsho kwabo.
Ngangandise ukuphumelele kukho konke esasikuthunywa kodwa ngelinye ilanga amadlozi angifulathela.
Igama lami ngingu Bernadino Muvadi ngazalwa ngo 1963, koZimuto eMasvingo.
Njengo mujibha ngaqala ukusebenza ndawonye labalwi bempi yenkululeko ngo 1977.
Ngangisebenza labo Cde Tsuro, Cde Tawanda Muhondo , Cde Seperayi labanye nje.
Angisoze ngafa ngakhohlwa umnyaka ka1979, ngize ngidutshulwe ngamabutho abelungu.
Ngangisasemncane kodwa ngilokhe ngikhumbula ukuthi kwakubuhlungu njalo kusethusa.
Kwakuphakathi kwenyanga kaNkwenkwezi ngo 1979 lapho abalwi yempi yenkululeko bangikhetha ndawonye labanye omujibha abayisithupha, ukuthi siye eNemarundwi.
Sasisiya nxusa izakhamizi zesiqinti se Nemarundwi ukuthi babuye kweyinye ipungwe eyayisenzelwa esiqintini seChivase.
Ngasengidiniwe, umzwangedwa wami wawungitshela ukuthi kulento embi ezakwenzakala, njalo ilihlo lami lesandleni sonxele lalidikiza, uphawu engakhulwa ngitshelwa ngugogo ukuthi kutshengisa ukudana phambilini.
Kwakungumango othatha ihola elilodwa kodwa safika kusiqinti seNemarundwi ngemizuzu engamatshumi amane lanhlanujk.
Ngasengitshaywa luvalo manje.
Ngisakhumbula ngangingagqokanga ijesi njalo ngingela zicathulo.
Saqoqoda kumizi yonke sinxusa abantu ukuti baye kupungwe.
Lokhu ebengikutshelwa ngumzwangedwa wami kwenzeka.
Sathi siqoqoda komunye umuzi dhukudhuku lebutho labelungu elalichatshe kweyinye indlu.
Asizange zabazi ngoba begqoke izigqoko zabo.
Sasesibuthanise phose abantu abangamatshumi amahlanu sesingena indlela sisiya eChivase lapho okwakulepungwe khona.
Sasihamba ngeziqembu ezintathu.
Mina ngangikuqembu elalikhokhela.
Sesihambe okwemizuzu elitshumi lanhlanu sabona abantu esasingabazi, ababegqoke izigqoko zabo kodwa bethwele izikhali.
Ngingakawuhlabi umkhosi ngasengidutshulwe isandla lonyawo lonxele.
Kwasuka kwabamnyama tshu emehlweni kodwa ngangisizwa imibhobho ikhala.
Ngasuka ngaphaphama ngisemangcwabeni.
Kulapho engatshelwa ukuthi umalumami uAugustine wayengithwale wangisa kulindawo.
Umalume wangitshela ukuthi wayebaleka njani engibhabhule emhlane.
Ngathaba kakhulu lapho engitshela ukuthi abanye bami omujibha babenelise ukubaleka.
Yimi ngedwa engalimalayo.
Ukuze amise ukopha kwegazi, umalume wadabula iyembe yakhe wangibopha lapho engangidutshulwe khona.
Wasengibhabhula saze sayafika kwesinye isiqinti eduze lapho okwakuhlala khona ubabakazi wami duze lesonto yeSt Peters yamakatolika.
Wangitshiya kobabakazi wagijimela ekhaya ukuyabaziza okwakusiwele endleleni.
Kwasekunzima ukuhamba loba ebusuku ngoba ibutho labelungu laseligcwele indawo yonke, kodwa umalume wenelisa ukuphenduka elomfowami uTitus.
Bangithwalela esibhedlela seKapota.
Safika eKapota ngehola lesithathu ekuseni.
Umongikazi owangamukelayo wangisiza ngokugezisa izilonda, lokuthi igazi lingaqubeki lisopha.
Kwathi ngemva kwamahola amabili ngathwalelwa esibhedlela esikhulu seMasvingo ukuze baqubeke bengelapha.
Angisoze ngalikhohlwa leli langa.
Lalamhlanje lokhe ngilawo amanxeba okudutshulwa ngalelolanga.
Ngangizimisele njalo ngilokhu ngizimisele ukufela ilizwe leZimbabwe.
Indaba le ithethwe ku The Patriot yamhlaka Mabasa 10-16 2015.