Nyaya iyi yakanyorwa naMunhamu Pekeshe ikaturikirwa naRujeko Jangano

MUNGUVA pfupi yadarika ndakaenda kunzvimbo inochengeterwa humbowo hwenhoroondo yenyika yedu nechinangwa chokuita tsvakurudzo yemagamba enyika yedu segadziririro yangu yezororo ratanga takatarirana naro remagamba enyika.
Semunhu ange asinganyatsozivi pokutangira, ndakasarudza kuvamba nokuenda kuchivakwa chinowanikwa pamusuwo wenzvimbo inovigirwa magamba enyika ino inodaidzwa kunzi National Heroes Acre.
Mushure mokutarisa-tarisa kusina hudzamu, ndakabatwa maziso nemagamba maviri anoti, George Rubatso Marange naDaniel Madzimbamuto.
Chakaita kuti ndibatikane nenyaya yaGeorge Rubatso Marange imhaka yokushaikwa kwemashoko pamufananidzo wake uye panaMadzimbamuto chakandibata kushaikwa kwemashoko ane hudzamu pamunhu mukuru akambosungwa muhondo.
Ndakaita kahurukuro nemushandi aive pabasa musi uyu maererano nokuwanikwa kwenyaya dzemagamba maviri aya.
Mushandi uyu akandiyambira kuti ndinyore nezvegamba Madzimbamuto uyo ane nyaya yake yakaunzwa nemhuri yake, kunyangwe paindaneti nhoroondo yaMdzimbamuto yaigona kuwanikwa asi zvaGeorge zvaive zvishoma.
Ndicho chikonzero chakaita kuti nditange kunyora nezvaGeorge Marange.
Ndakatora zuva rose ndichida kuziva nekunzwisisa George nemabasa ake.
Ndakaedza kutsvaga munzvimbo dzinowanikwa humbowo uhu zvikashaya basa.
Ndakazokwanisa kuwana zvishoma kubva ku A Guide to the Heroes Acre, nemumamwewo mafaira.
Hapana kana zvandakaona zvainge zvakanyorwa.
Saka izvi zvishoma ndizvo zvatichapa kuzvizvarwa zvichavatevera?
Ndakafunga kuti tingadai tichitoparadza nhoroondo panguva ino.
Kana pasina zvisvinu zviripo pamusoro pegamba iri mumakore mashoma mushure mokutisiya, ko pamakore makumi mashanu achazotevera chii chichazenge chiripo?
Pakakwana nguva yesvutugadzike ndainge ndatopedza kutarira magwaro ose kusiya kweiro reChristian Care.
Pfungwa dzangu dzakadzoka kundangariro kumushakabvu anova baba vangu.
Mumakore apfuura anokwana kuita gumi nemashanu ndakarasikirwa nababa vangu.
Hupenyu hwababa vangu hwaisave nyore kuhunzwisisa .
Baba vangu munhu aive nechido nedzidzo izvi zvinoonekwa nekudzidza kwavakaita.
Baba vaive munhu ainge akarongeka pane zvose.
Nguva nenguva vaigarotiyeuchidza nezvebudiriro yavo mune zvedzidzo.
Ambuya vanogarotaura nezvekutambura kwavakaita pakudzidzisa baba vangu sezvo vaive vanhu vairarama hupenyu hwekutamburira.
Vaitiudza zvakare nezvekugona kwavo mutambo wetsiva kudhibha.
Nerimwe ramazuva apo takavhura bhegi rerata raambuya takasangana nemabhuku ababa ekuchikoro airatidza kukunda kwavo.
Vaive nechipo chavo.
Ichokwadi kuti nhoroondo yavo yaive nezvakawanda zvokukurukura nezvayo.
Zvimwe zvezvinhu zvavaiita zvakaenderera mberi, zvizvinji zvacho zvakarasika.
Nhoroondo yekukunda kwavo kuchikoro yakatorasika nezvimwe zvakawanda.
Changosara chete ndezviri mundangariro dzedu, pamwe neguva ravo, tsamba inotaridza kufa kwavo, gwaro remba pamwe netsamba yekugoveva kwenhaka.
Nekurasika kuri kuita zvinhu zvehumbowo izvi, chii chichazowanikwavo nezvizvarwa zvichatevera?
Kungozvifunga ndinopindwa nechando.
George Rubatso Marange anorangarirwa kuburikidza neHeroes Guide segamba guru renyika mune zvematongerwo enyika akafa mugore ra1997 ave nemakore makumi matanhatu nemanomwe.
Chinyorwa ichi chinorondedzera zvishoma hupenyu hwake, svikiro, dzidzo, matongerwo enyika mumisangano inosanganisira, SRANC, ZAPU, PCC pamwe nePF, kusungwa kwake pamwe nemabasa ayo akaita mushure menguva nyika ino yawana kuzvitonga kuzere mumisangano yeZAPU pamwe neZANU PF.
Gwaro renhoroondo yake rinofadza zvikuru ndikabatanidza nezvandakaona kuChristian Care ndinobuda negwaro rakakura zvikuru.
Izvi zvakaita kuti ndione kuti pane kusakwana kuripo munzvimbo dzinochengeterwa nhoroondo.
Pane humbowo hwakawanda husipo hungadai hwakawanikwa kumusangano wenyika pamwe nokumhuri dzamagamba aya.
Pasina humbowo uhu hwemhuri nebato rinogona kungova gwaro risina huremu.
Zvandakawana mutsvakurudzo zvinogona kuiswa muzvikwata zvinoti, zvematongerwo enyika, shamwari, mhuri, dzidzo pamwe nohutano.
Magwaro aripo parizvino mubatanidzwa wenyaya dzevanhu vainyora vachinzwira George tsitsi kuburikidza nehudzvanyiriri hwaakapindana nahwo panguva yaSmith.
Akasungwa akagara mutirongo kubva mugore ra1964 kusvika mugore ra1979.
Akagara mumajeri matatu anoti Wha Wha, Marandellas, Gwelo prisons neGonakudzingwa Restriction camps.
Pamakore anokwana kuita gumi nematanhatu akakwanisa kungorarama asiri muhusungwa mwedzi gumi nemitanhatu chete.
Pane imwe nguva akambotora chidanho chemutevedzeri wezvehomwe yemari kuPPC.
Nyaya yaGeorge Marange yakatokonya vanhu vakawanda vanosanganisira shamwari, makambani ruzhinji pamwe nevari kunze kwenyika.
Mamwe emasangano aya anosanganisira Amnesty lnternational, lnternational Defence Fund, pamwe neInternational Red Cross.
Dzimwe mhuri dzekuSweden neGermany dzakaratidza zvakare chido chokubatsira mhuri yaGeorge iyi.
Christian Care haina kutaridza chido mukubatsira George nezvikonzero zvayowo zvematongerwo enyika.
Kuburikidza neshamwari idzi mhuri yekwaMarange yakawana rubatsiro runosanganisira mari yechikoro, mari yekuterera imba, mbatya pamwe nezvekudya.
Mudzimai wake Mavis Sachikonye, ambuya pamwe nevana vaviri Edwin naTikko vakatonyorwa mugwaro iri sevanhu vakawana rubatsiro kumasangano okunze anobatsira.
Vamwe vakanyorwa ndevanoti vabereki vaGeorge madzitezvara pamwe nedzimwe hama dzake.
Mudzimai wake akazoenda mhiri kwamakungwa kunoita zvidzidzo pamwe nokushanda.
Ambuya vake pamwe nevana vakasara varimuno munyika.
Mushure mokuwana rusununguko mugore ra1980 zvinyorwa zvinoburitsa kuti George akazoroora mumwe mudzimai, Mrs Thembani Marange.
Panguva yakasungwa gamba redu rainge ratove mudzidzisi nechakare.
Mushure mokubuda mutirongo, George akaenderera mberi nezvidzidzo zvake kunyanya zvesvomhu nemagariro evanhu.
Ichokwadi kuti humbowo hwakakura hwegamba iri haumo mumagwaro enhoroondo, kunze kwekunge tanyora pasi nhoroondo yaGeorge nemamwe magamba akadaro zvizvarwa zvemangwana zvichaverenga dehwe munyepfu pasina!
Nyaya iyi yakatorwa muThe Patriot remusi wa Chikunguru 25-31 2014.